Prins Frank 1e regeert euver ’t Kaanjelriek in 2012.
themuut | 30 januari 2012
( Klik op ziene foto veur ’n groete weergaaf )
Prins Frank 1e (Frank Erkamp) regeert in 2012 euver ’t Kaanjelriek. Lees hei-oonder ’t offisjeel Peersberiech:
Oonder groete belangstelling is op zoondag 29 jannewarie 2012
Prins Frank d’n 1e es 57e hoeglöstigheid
vaan c.v. de Kaanjeleers vaan Famfaar Juliana oet Lummel oetgeroope.
Ziene börger naom is Frank Erkamp. Heer is geboore op 6 mei 1963 in Meerssen aon de Gansbaan en noe daan ouch 4*11 plös 4 jaor aaijd, Heer heet gewoend aon de Veldstraot in Hier, aon de Ankerkade beij de stuw in Lummel. Zien prinselik pelies steit noe aon de Pletzerstraot in Wolder.
Heer woent dao same mèt Liza Westerlaken, die oet Wijdenes kump in de buurt vaan Hoorn in Noord Holland. Häör awwers hadde dao ‘nne kaffee. Dao in ze is opgegreujd en ze hadde dao warempel ouch ’n raod van ellef. Same höbbe ze veer kinder, Jeroen, Robin, Jeroen en Maarten.
Binne eus Famfaar Juliana is heer al 17 jaor bestuurslid mèt es bezundere take de coördinatie vaan de reiskemissie.
Nao de lieger sjaol, de HAVO Jean D’arc en zien opleijing aon de MTS bouwkunde heet heer zien aonnummers diploma gehaold en is heer in ’t bedrief dat opgeriech is door ziene Pap goon wèrreke. Noe is heer eigeneer / directeur vaan Erkamp bouwservice. Daobeij is heer dealer van e plug&play bouwsysteem boe in eine daag ‘nne oetbouw of zèllevers e gans hoes geplaots weurd.
Zien groetste hobbies, es heer tied kin vrijmaake vaan zien wèrrek, zien de Famfaar, lekker nao de Sauna goon, motor reije, peerdreije, en vreuger, vèsse en sjeete op de sjeetbaon. Ouch is heer holistisch Reiki therapeut, zjus wie eus tituleir prinses Liza die heer dao heet liere kinnen op dees opleijing, en in ’t wichelroede loupe is heer ouch zier bedreeve.
Heer heet ‘nne hekel aon onoprèchtigheid. Wat heer èch leuk vind is eigelik zien wèrrek. ’t lekkerste ete vind heer alle soorte Muesli, dat kins ste häöm ’s mörgens, ’s middags en ’s aoves veurzètte. ’T minst lekker um te éte vind heer dinger die pittig en vet zien. Zien gooi eigesjappe volgens zien vriendin Liza: Ziene humor, heer kint good luustere, en is leef veur Liza. Heer is ech heure prins en behandeld heur daan ouch , af en tow, es ’n prinsès.
’n gèt minder gooij eigesjap is tot heer soms gèt snel is mèt zien oordeil en de aofsprake oet ziene callepin en de rès vaan zien time management zien neet altied um euver nao hoes te sjrieve.
Heer zal regeere euver ’t Kaanjelriek vaan Famfaar Juliana onder de zwoer gekose titulair benumminge
Reiki-therapeutikös * Bouwtechnikös * Bestuurdikös
es zienne’n Hoeglöstigheid:
Prins Frank d’n 1e
Hei-oonder kint geer ’n fotoripportaasj bekieke:
(Klik op “Volledig scherm” in het aofspeulvinster veur ’n groete weergaaf.)