Limmel Maastricht

Wim Gorren heet es bliek vaan waardering veur Otoriteitetoeker Jan Janssen vaan de Tempeleers de volgende ode gesjreve:

Ode aon Jan Janssen

Bèste Jan,

Geer zeet veur de Tempeleers eine vaan de groete  Proffete,
eine dee de mieste sjoen Mestreechse wäörd heet verslete.

Zoe höb geer es Sirremoniemeister dèkser de spits aofgebete,
en uuch vaan dees meujelike taak altied manjefiek gekwete.

Bijj de Machseuverdrach hure v’r nuijtsjes en weurt verwete,
tot de Otoriteitetoeker bijj bepaolde luij de uigskes liet versjete.

Eur käös vaan ónderwerrepe waor dèks sjerrep mer aofgemete,
door uuch es verhäölkes, veerskes en leedsjes gebrach en geslete.

In 11 + 3 jaor höb geer uuch ’ne eige spesjaole stijl aongemete,
dat höbbe veer Börregemeisters mèt mage make en ouch gewete.

Philip, Gerd, Jan en Onno höbbe mèt ’t zweit in de han gezete,
Wèthawwers, Raodsleije en Minnisters kóste in dees rijj aonslete.

Geheim brónne waore gelökkig ouch dao en lete uuch rap wete,
es iemes weer get tösse de mör vaan ’t Stadhoes had oetgevrete.

Väöl bespraok geer mèt Anneke mèt ’n Eelske of ónder ’t ete,
sóms zag geer wel ’ns helop: ’Had iech miech mer besjete !’

Geer höb ’t Vollek vaan Mestrecch väöl laote lache en genete,
de sjariteit zit in eur hart, geer daot neet allein get veur mónnete.

Tijjdens eur bekindmaking um te stoppe, höbbe v’r us verbete,
’n momint vaan sjevraoje en traone, jao sómmige höbbe gekrete.

En um dees ’Ode aon uuch’ mèt ’ne groete Merci te mage beslete,
Jan, geer waort grandioos: Chapeau, v’r zalle uuch neet vergete !

Bedaank en ….. Vastelaovend same !

Mestreech, 5 miert 2011 © 2011 Wigo

www.wigosite.nl