Limmel Maastricht

Luij, Vastelaovend steit weer veur de deur en dit sezoen höbbe veer weer get miejer tied in de veurbereijinge. Veur ’t oetrope vaan de 38^e Hoeglöstigheid goon veer naor 25 jannewari. Dees opebaar protoculair zitting in ’t Kap. Lochmanhoes geit dit jaor ’n oor ieder beginne, dus vaanaof 19.11 oor zalt geer wete wee de vastelaovend vaan 2009 veur zal goon in Lummel en Nazareth. Ouch deen aovend zal de daan nog keersveerse Stadsprins mèt zien Tempeleers acte de present geve. Daoneve nudig iech uuch ouch oet um ‘ns te koume kieke nao ’t Lochmanhoes dat is umgetoverd nao ‘nne Veneticiaanse tempel. De live meziek weurt verzörreg door The Melodies.

Twie weke later op  8 fibberwari is weer de beurt aon de kinder want daan weurt veur de 25^e kier um 14.11 oor ’t nuij jäög prinsepaar ontmaskert door de nuije Hoeglöstigheid vaan Lummel en Mestreech. Saoves goon de volwassene weer weijer mèt ‘de Thema aovend dat dit sesoen weer in ’t teike steit vaan Pyama’s!!! En DJ Ron Rossel  geit probere ederein wakker te hawwe mèt ziene geweldige meziek!!!

Vief daog later 13 fibberwari laote veer e gewèldig evenemint trök koume naomelik ’t Karnevals-kiene, en heijmèt beginne veer aon e marathon-wiekend.
D’n daag denao 14 fibberwari steit de resepsie gepland boebeij ouch dit jaor weer ederein in de gelegeheid weurt gestèld de Braniemeekers mèr zeker ouch de nuije Hoeglöstigheid te filleciteere. Deen daag zal de Hoeglöstigheid ouch de kraanke oonder us vaan Lummel en Nazareth goon bezeuke. Weer ‘nne daag weijer zien veer aongekoume op de 15^e fibberwari en daan goon veer weer mèt z’n alle naor de kerrek vaan St Jaan d’n Duiper um daan ouch eve stél te stoon beij al die aander zake in de werreld.
Let wel eve op: Dees més begint in tegestelling tot aandere jaore um 9.00 oor. 
En smiddags mage de kinder ziech weer oetleve want daan is weer de zaol veur hun gerisserveerd. Deen middag zal DJ Ron Rossel goon zörrege veur de gooj ambiance. Veur de Mestreechter aovend dee plaots zal vinde op 19 fibberwari moot geer de volgende bekindmaking mèr eve in de gate hawwe.

Daan zitte veer al aon de Vastelaovend en daan gaon iech uuch eve gèt vertèlle euver de optoch dee op vastelaoves-maondag 23 fibberwarie zal goon trekke vaan Nazareth naor Lummel. En geer höb ’t zèllef kinne mètmake wie sjiek de optochte vaan de lètste jaore zien. En dat kump allein mèr doordat geer uuch ouch daoveur inzèt want allein same make veer dao gèt sjoens vaan. Ouch noe kint geer weer zèllef mèttrekke in de cortége en daan maak ’t ouch niks oet of geer allein of mèt ‘nne grôp mètgaot en of dat op ‘nne fiets of te voot is en zèllefs ‘nne wagel is good, es ’t mèr op ’n veilige meneer geit. Moch geer interesse höbbe um deil te numme daan kint geer veur alle imformaasie terech beij, Roy Joosten 0642944132 of per meel royjoosten@live.nl

‘T sprik veur ziech dat geer ouch vastelaoves-zondag 22 fibberwarie en vastelaoves-maondag 23 fibberwarie weer terech kint in ’t Kap. Lochmanhoes veur dee onvervalse Vastelaovend vaan Lummel en Nazareth. Daan res miech allein nog Uuch naomes alle Braniemeekers ‘nne zaolige en propere vastelaovend tow te winse en welliech treffe veer us daan al op 25 jannewarie beij ’t prinsoetrope in uzze sjoen verseerde hoftempel ’t Kap Lochtmanhoes.

Mat Brüll
PR kemissie  C.V. De Braniemeekers

Alles leze euver de Braniemeekers kiek daan op www.braniemeekers.nl