Limmel Maastricht

Op vriedag 5 fibberwari beginne um 19.15 oor de Braniemeekers met ’t ludieke carnavals kiene in hunne hoftempel ’t Kap. Lochtmanhoes. Vaanaof zes oor zalle veer uuch weer vaan harte welkom heite en uuch weer laote geneete vaan unne gezellige aovend vol plezeer en gèt awkloete en neet te vergete weer magnefieke preize .

Dit jaor zien d’r gèt aonpassinge boemèt veer ’t aontrèkkelikker veur uuch wèlle make mèr zeker neet minder gezèllig. ‘T sprik veur ziech dat de preise ouch weer nao venant zien met e paar hiel ludieke debeij. In de pauze stoon d’r weer bruudjes veur uuch klaor en aon d’n doors is ouch gedach . Veer zalle de aovend starte um keteer nao zeve zoetot veer kleine pauzes kinne inlasse veur de roukers oonder us! Degène mèt ’t sjoenste pèkske zal door de Hoeglöstigheid veurzeen weure vaan e leuk presentsje en ’n kienkaart nao käös! Dus pak deen kans zow iech zègke en kom verkleijd naor ’T Lochtmanhoes veur ‘nne leuke en sjoene aovend! De preise vaan de kienkaarte zien; Eine serie € 5.50 – Twie series € 6.50 en Dreij Series € 7.50.

Zaoterdag 6 fibberwari vaanaof 18.00 oor kreig ederein de gelegeheid um de Hoeglöstigheid Prins Marcel I te fillesitere mèt zien benumming tot Prins euver ’t riek vaan de Braniemeekers. Dees resepsie weurt muzikaol opgeluustert door herremenieke In ein gedreijt.

Zoondag 7 fibberwari beginne veer um 9.00 oor mèt us jaorlikse Mestreechter Més in de kèrk vaan St. Jaan d’n Duiper in Lummel. Same mèt Pestoer Backus, Famfaar Zjuliana en ’t kerrekkoer goon veer eve stèl stoon beij wat de vastelaovend nog miejer inhèlt. Nao dees mès zalle us zjubbelarisse Gerda Laurensse, Francine Boumans, Meriam Walthie en Theo Schefman allemaol 1×11 jaor en Hans Volders 3×11 jaor intern in ’t zönneke weure gezat.

S’middag vaanaof haaf twie is d’n tied dao dat de jäög weer vastelaovend kint viere. Saame mèt de Braniemeekerkes, Prins Marcel I en zien Braniemeekers. Door DJ Ron Rossell weurt geer in de stumming gebrach.